AMT-2024-0099: Servicio de desarrollo de nuevas funcionalidades, soporte y mantenimiento de la gestión de ciclos formativos, admisión a centros y otros sistemas del ámbito educativo

Modificación 1

A Consellería de Educación, Ciencia, Universidades e Formación Profesional presentou un plan de redución de tarefas administrativas (https://www.edu.xunta.gal/portal/node/47354). A simplificación das tarefas administrativas constitúe un compromiso prioritario da Consellería de Educación, Ciencia, Universidades e Formación Profesional (CECUFP). O 11 de outubro de 2023 asinouse o Acordo entre a consellería e as organizacións sindicais CC.OO., ANPE e UGT-SP Ensino sobre medidas que melloran o funcionamento do sistema educativo e as condicións laborais do persoal funcionario e laboral docente da Comunidade Autónoma de Galicia que imparte as ensinanzas reguladas na Lei orgánica 2/2006, do 3 de maio, de educación. Na epígrafe 7 de medidas complementarias estableceuse o compromiso de elaborar un plan de simplificación das tarefas burocráticas nos centros docentes que permita unha maior dedicación do persoal docente ás actividades especificamente educativas. A raíz deste acordo, a CECUFP iniciou os traballos previos de identificación das necesidades e deseño deste documento en colaboración cos sindicatos asinantes. Isto permitiu profundar, definir accións e establecer un calendario para a implantación progresiva das mesmas. A posta en marcha destas iniciativas de redución das tarefas administrativas nos centros docentes require unha planificación estratéxica cun claro e firme compromiso institucional, unha implicación activa dos distintos actores do sistema e unha adecuada dotación de recursos e ferramentas, especialmente no que atinxe aos sistemas de xestión do eido educativo actuais, que se verán afectados por moitas das liñas de actuación identificadas nese plan de simplificación das tarefas burocráticas nos centros docentes. Adicionalmente a Amtega elaborou un plan de evolución da Plataforma Educativa Dixital no ámbito da educación non universitaria en Galicia. Dita infraestrutura enmárcase nas políticas públicas da Xunta de Galicia orientadas a garantir unha educación de calidade. Este enfoque busca atender tanto ás características individuais do alumnado como ás particularidades da súa contorna familiar, promovendo unha educación equitativa, inclusiva e centrada nas persoas. O punto de partida para a evolución tecnolóxica e funcional (tanto no plan de simplificación publicado pola Consellería como no plan de evolución tecnolóxica presentado pola Amtega) son os sistemas de información actual, moitos dos cales precisarán dun considerable reforzo das capacidades dos equipos de desenvolvemento actuais para seguir mantendo as convocatorias ordinarias nos procesos xa dixitalizados, ao tempo que se planifican e se encaran as tarefas propias desa evolución no que atinxe aos sistemas actuais. Este modelo de convivencia entre as tarefas actuais e as novas necesidades aplica practicamente á totalidade dos sistemas de información actuais, aínda que en varios deles o esforzo de evolución funcional será máis marcado polas necesidades identificadas nos plans presentados. Así, todo o relacionado cos sistemas comedores, transporteescolar, contausuario, ciclosprobas, ciclosadmision, xie, doc, avalia, programacions , fondolibros, titulos, homologacions, admisionalumnado, axudaslibros, protocolos educativos, uptcentros, xecocentros, gasfun e CONVA precisarán, ademais dunha evolución tecnolóxica transversal a todos os sistemas, actuacións de evolución funcionais e de rediseño profundo en base ás actuacións recollidas en ditos plans. Ese incremento no esforzo adicado a eses sistemas non é asumible, nos prazos previstos por Consellería e Amtega, coa carga de traballo ordinaria nos equipos actuais de desenvolvemento e mantemento deses sistemas. Cómpre, por tanto, ampliar a capacidade do equipo de desenvolvemento para encaixar axeitadamente as tarefas derivadas das necesidades descritas. Unha valoración interna do traballo que leva consigo encarar ditas tarefas, baseada en experiencias previas, deu como resultado o seguinte esforzo estimado dos perfís participantes no proxecto ata o remate do contrato actual (25/12/2026): 2.100 horas de analista, 4.200 horas de analista programador, e 4.200 horas de programador, é dicir, un total de 10.500 horas de traballo adicionais.